:: tumhaara shahr to SaHraa dikhaa'ii detaa hai ::

yaaraan-e-bazm, aadaab !

apnii aek intehaa'ii saadah aur taazah-tareen Ghazal ke saath Haazir-e-Khidmat hooN, ummeed hai k
apnii be laag raaye se aagaah farmaayeN ge !

shukriya

:: Urdu Version ::

:: Roman Version ::

1.

jise bhi dekhiye tanhaa dikhaa'ii detaa hai
tumhaara shahr to saHraa dikhaa'ii detaa hai

2.

jahaaN jahaaN tira jalvaa dikhaa'ii detaa hai
maiN kyaa kahooN mujhe kyaa kyaa dikhaa'ii detaa hai

3.

maiN us ke lutf-o-sitam meiN tameez kaise karooN?
k har taraH se voh apnaa dikhaa'ii detaa hai

4.

qadam qadam pe badaltaa hai aek raNg nayaa
yeh shahr bhii mujhe tum saa dikhaa'ii detaa hai!

5.

ragoN meiN josh-e-maHabbat se Hashr barpaa hai
dil aek aag ka daryaa dikhaa'ii detaa hai!

6.

subak-ravaan-e-talab kaa nishaaN vaheeN hai jahaaN
Ghubaar-e-Khaatir-e-SaHraa dikhaa'ii detaa hai!

7.

na jaane kitne hi toofaaN haiN us ke seene meiN
voh jo kinaare pe baiThaa dikhaa'ii detaa hai!

8.

dil-e-Ghareeb ! chalo kuch suneN sunaayeN aaj
voh door aek sitaaraa dikhaa'ii detaa hai!

9.

yahaaN pe kon tirii chashm-e-nam ko poochhe gaa?
yahaaN to har koi rotaa dikhaa'ii detaa hai !

10.

mile to kaise mile un ki tishnagii ka suraaGh
voh jin ki aaNkhoN se daryaa dikhaa'ii detaa hai!

11.

hamaara Haal naheeN khulta apne hamdam par
buraa ho dil ka, jo achchaa dikhaa'ii detaa hai!

12.

a'jab naheeN k use maut kaa bhii Khauf naheeN
k voh Hayaat ka maaraa dikhaa'ii detaa hai!

13.

Zia yeh aaj samandar meiN kon utraa hai?
k qatrah qatrah machaltaa dikhaa'ii detaa hai!

........................

Zia Baloch

mehmaan Number of posts : 20 Location : USA Registration date : 2007-12-06

Zia Baloch Saheb:

Adab

Kis kis sher ki tareef ki jaaey. Ye tow poori ghazal hi qayamat hey. Wah wah. Aap ke matl'a per mujhey apna ek fazool sa sher yad aa gaya. Berdasht ki jiye:

Her samt nazar ja ke palat aati hey heraN
is shehr ko itna kabhi weeraN naheeN dekha.

Dher sari daad ke saath

Kher andesh

Qamar