HaaZreen e meHfil, aadaab. Aik Ghazal pesh e Khidmat hai, is ummeed k saath kay aap apni aaraa say maHroom nahiN kareiN gay.shukriyah.
Gham tera mujh ko soney nah dey raat bhar
dill sulagtaa hai is aanch say raat bhar
tere waadey, wafa, yaad, tanhaa~iyaaN
kyuN bhatak~tey haiN yeh Qaafiley raat bhar
bhook, weHshat, moHabbat, wafa, zindagii
Tim~Timaatey rahey yeh diye raat bhar.
unko suuraj kii pehlii kiran kya miley?
jo bahaltey rahey Chaand say raat bhar.
neend palkoN pe Aa Aa kay jalti rahi
yeh sitam bhi kiya raat ney raat bhar.
yeh teri bay Hisii hai kay tera SAMEER
din ko yuNhi phiray aur likhay raat bhar.
SAMEER