sukhan dostaN ke Hazir aur mutavaqqo ahbaab ko
assalam alaikumsab se pahle Hamd pesh karne ki sa'aadat haasil karne ka moqa faraham karne par allah ta'aala ka shukr guzar hooN.
HAMD
vahdat e dard meiN tu kacrat e izhaar meiN tu
dil meiN aaya tha k aane laga ash'aar meiN tu
shiddat e tashnagi e Hajira meiN tera suraaGh
reg e sahra meiN ravaaN chashma e asraar meiN tu
haaN .koi deeda e yaqoob se dekhe tau khule
ek rozan ki tarah band hai deevaar meiN tu
laHn e Dawood pe qurbaan mere saut o sukhan
aaj bhi naGhma sara hai mire mizmaar meiN tu
dast e bebaak e Zulekha se bhala kia khulta
mahv tha daaman e Yuosuf ke har ik taar meiN tu
meiN na hooN ga tau kahaN dekh sake ga khud ko
aaina dekh raha hai mire aacaar meiN tu
rubaroo laaii hai tujh ko miri roogardaani
mire inkaar se aaya mire iqraar meiN tu
HUVAL MUJEEBLIAQUAT ALI ASIM